Kennarasamband Íslands

27. okt. 2011

Forgangsröðun í þágu barna og ungmenna

Stjórn KÍ samþykkti á fundi sínum 21. október ályktun um forgangsröðun í þágu barna og ungmenna. Þar er því beint eindregið til ríkis og sveitarfélaga að standa vörð um velferð og öryggi barna og ungmenna og tryggja að ekki verði gengið á hagsmuni þeirra í þeirri fjárhagsáætlanagerð sem nú stendur yfir. Stjórnin telur að nú þegar hafi ríki og sveitarfélög gengið of langt í niðurskurði í skólastarfi og að mál sé að linni. Þá segir: „Kennarasamband Íslands telur mjög brýnt að hlúð sé að skólastarfi, ekki síst á erfiðum tímum. Því er mikilvægt að ríki og sveitarstjórnir vandi vinnubrögð sín. Nám og starfsaðstæður hafa mótandi og varanleg áhrif á framtíð einstaklinga og því mikilvægt að skólastarf verði ekki fyrir frekari skaða vegna vanhugsaðra sparnaðaraðgerða. Að auki er mikilvægt að allri gjaldtöku í sambandi við skóla- og frístundastarf sé haldið í lágmarki til að tryggja jafnrétti nemenda óháð efnahag foreldra. Einnig bendir Kennarasambandið á að nýjar aðalnámskrár leikskóla, grunnskóla og framhaldsskóla gera breyttar kröfur til faglegrar vinnu og fjárhagslegra bjarga. Til að hægt verði að koma til móts við þær kröfur þarf fjármagn til skólastarfs að aukast frekar en hitt. Kennarasamband Íslands skorar á skólayfirvöld að hlúa vel að skólunum og setja með því hagsmuni og líðan barna og ungmenna í forgrunn.“
Lesa meira

27. okt. 2011

Innskráning á Mínar síður

Félagsmenn athugið! Vandræði eru með uppsetningu á skilríkjum frá Auðkenni vegna innskráningar á Mínar síður KÍ. Verið að vinna að lausn málsins. Vinsamlegast sýnið þolinmæði.
Lesa meira

26. okt. 2011

Afmælistónleikar TKÍ í Hörpu á föstudaginn

Í tilefni af sextíu ára afmæli Tónmenntakennarafélags Íslands verða haldnir afmælistónleikar í Norðurljósasalnum í Hörpu föstudaginn 28. október, kl. 16:00-17:30. Fram koma tónmenntanemendur fjölda grunnskóla þar sem sköpunargleði og fjölbreytileiki eru í fyrirrúmi.
Lesa meira

26. okt. 2011

Kennarastarfið er erilsamt og mótsagnakennt

Í hugleiðingu kennslukonu í vetrarfríi segir höfundur, Anna Lára Pálsdóttir, meðal annars: „ Í mínum huga samræmast stórar bekkjardeildir ekki hugsjóninni um skóla án aðgreiningar. Það er kennarinn sem dregur það hlass og trúið mér það er enn þyngra nú á tímum niðurskurðar.“ Lesið stórgóða hugleiðingu Önnu Láru um sektarkennd kennara, skólann sem barn módernismans og hina fjölmörgu þætti kennarastarfsins hér í fréttinni. Það er grunnskólastigið sem er til umræðu en hér er margt sem kennarar á öðrum skólastigum kannast við líka.
Lesa meira

25. okt. 2011

Samstarfsnefnd um símenntun/starfsþróun kennara var stofnuð í sumar

Samstarfsnefnd um símenntun/starfsþróun kennara á öllum skólastigum neðan háskólastigs var stofnuð í sumar. Mennta- og menningarmálaráðuneytið, Kennarasamband Íslands, Menntavísindasvið Háskóla Íslands, Háskólinn á Akureyri, Listaháskóli Íslands og Samband íslenskra sveitarfélaga hafa gert með sér samkomulag eða sérstaka viljayfirlýsingu um samstarf á sviði símenntunar og mörg brýn og spennandi verkefni eru á borði samstarfsnefndarinnar.
Lesa meira

25. okt. 2011

Málþing um nýja aðalnámskrá leikskóla - skráning hafin

Félag leikskólakennara, Félag stjórnenda leikskóla, Samband íslenskra sveitarfélaga og mennta- og menningarmálaráðuneytið bjóða til málþings um nýja aðalnámskrá leikskóla í Reykjavík 7. nóvember og á Akureyri 14. nóvember. Meðal annars verður fjallað um nýjungar í þessari námskrá, skólastefnu sveitarfélaga og skólanámskrárgerð með heimspekikaffiaðferðinni.
Lesa meira

24. okt. 2011

Kennarahúsið verður lokað frá kl. 13:45 ...

... mánudaginn 24. október nk. vegna fundar starfsmanna. Opnað verður aftur á venjulegum tíma, kl. 9:00, á þriðjudagsmorguninn.
Lesa meira

21. okt. 2011

Yfirlýsing stjórnar KÍ - Samþykkt á stjórnarfundi 21. október 2011

Að undanförnu hefur verið ágreiningur milli stjórnar Vísindasjóðs FF og FS annars vegar og stjórnar KÍ hins vegar um atriði sem varða daglega umsýslu með fjármuni sjóðsins, bókhald og afgreiðslu umsókna um greiðslur úr sjóðnum. Stjórn KÍ hefur leitað leiða til að leysa þennan ágreining og fengið lögmann sambandsins til margra ára til að freista þess að finna lausn á málinu. Sú viðleitni hefur ekki borið árangur fram til þessa.

Stjórn KÍ hefur af þessu tilefni óskað eftir skriflegri skýrslu endurskoðenda sambandsins um það hvort bókhaldskerfi sem heldur utan um fjárreiður Vísindasjóðsins sé fullnægjandi og uppfylli þær kröfur sem til slíkra kerfa eru gerðar samkvæmt lögum. Jafnframt hafa endurskoðendurnir verið beðnir um yfirlýsingu um hvort fram hafi komið vísbendingar um að meðferð fjármuna og/eða bókhaldsleg umsýsla með málefnum sjóðsins hafi ekki verið í samræmi við viðurkennda framkvæmd samkvæmt bókhaldslögum.

Skýrsla endurskoðendanna var afhent formanni KÍ í gær og lögð fyrir á fundi stjórnar í dag. Í stuttu máli telja þeir athugasemdir sem fram hafa komið ekki gefa tilefni til alvarlegra aðfinnslna og að ekkert sé fram komið annað en að meðferð fjármuna sjóðsins sé í góðu lagi. Bókhald KÍ verður skoðað í samvinnu við lögfræðinga og löggilta endurskoðendur og þeir vankantar lagaðir sem koma í ljós. Stjórn KÍ þykir miður að stjórn Vísindasjóðsins skuli hafa kosið að fela umsýslu sjóðsins öðrum aðila en Kennarasambandi Íslands. Stjórn KÍ mun strax gera ráðstafanir til að afhenda sjóðsstjórninni þau gögn sem tilheyra sjóðnum og ekki hafa þegar verið afhent. Með hagsmuni félagsmanna í huga telur stjórn KÍ mjög mikilvægt að löggiltir endurskoðendur KÍ og sjóðstjórnarinnar tryggi að fullnægjandi bókhaldskerfi taki við umsýslu um málefni sjóðsins.

Fyrir hönd stjórnar KÍ,

Þórður Á. Hjaltested
Formaður KÍ

Lesa meira

20. okt. 2011

Mínar síður taka við Orlofsvefnum

Félagsmenn athugið! Frá og með 15. nóvember nk. verður lagður niður núverandi aðgangur að Orlofsvefnum og eingöngu hægt að fara þar inn í gegnum Mínar síður. „Mínar síður“ eru hér á forsíðu www.ki.is og undir hnappnum eru leiðbeiningar um nýskráningu. Með þessu er komið til móts við félagsmenn sem hafa bent á að auðvelt sé fyrir óviðkomandi að fara inn á síður þeirra á Orlofsvefnum. Munið að skrá ykkur á Mínar síður fyrir 15. nóvember!
Lesa meira

20. okt. 2011

Málstofa BÆR: Börn í velferðarríkjum Norðurlanda

Föstudaginn 4. nóvember kl. 14:00-16:15 verður haldin málstofan Bær: Börn í velferðarríkjum Norðurlanda í húsnæði Menntavísindasviðs við Stakkahlíð, stofu H-001.

Rannsóknastofa í bernsku- og æskulýðsfræðum BÆR stendur fyrir málstofu um bókina Barnen och välfärdspolitken. Nordiska barndomar 1900 - 2000. Höfundar bókarinnar eru Astri Andresen, Ólöf Garðarsdóttir, Monika Janfelt, Cecilia Lindgren, Pirjo Markkola og Ingrid Söderlind. Útgefandi er Dialogos og er bókin til sölu í Bóksölu kennaranema.
Lesa meira

18. okt. 2011

Ályktun frá ársfundi Skólastjórafélags Íslands 15. október 2011

Ársfundur Skólastjórafélags Íslands haldinn í Reykjanesbæ 15. október 2011 beinir því til sveitarfélaga að standa vörð um velferð og öryggi nemenda og tryggja að ekki verði gengið á lögvarða hagsmuni þeirra í þeirri fjárhagsáætlunargerð sem nú stendur yfir. Skólastjórafélag Íslands telur brýnt að samstaða ríki um að hlúð sé að skólastarfinu, ekki síst á erfiðum tímum, og því er mikilvægt að sveitarstjórnir vandi vinnubrögð sín og leiti aukins samráðs við skólastjórnendur við gerð fjárhagsáætlana. Hafa ber í huga að grunnnám nemenda hefur mótandi og varanleg áhrif á framtíð þeirra og því mikilvægt að starf skólanna verði ekki fyrir varanlegum skaða vegna vanhugsaðra sparnaðaraðgerða.
Lesa meira

14. okt. 2011

Nýr vefur um aðgerðir gegn einelti og kynferðislegri áreitni

Vakin er athygli á nýjum vef um aðgerðir gegn einelti og kynferðislegri áreitni. Vefurinn kallast „Höldum saman gegn einelti og kynferðislegri áreitni“, www.kolbrunbaldurs.is, og er búinn til af Kolbrúnu Baldursdóttur, sálfræðingi. Á vefnum er að finna upplýsingar um viðbragðsáætlun ef upp koma eineltismál eða kvörtun um kynferðislegt áreiti. Einnig er þar að finna forvarnarfræðslu, upplýsingar um algengar birtingamyndir eineltis og kynferðislegrar áreitni og ýmsar gagnlegar ráðleggingar. Vefurinn getur gagnast stjórnendum, starfsmönnum, kennurum, foreldrum og nemendum jafnt sem þolendum og gerendum eineltis.
Lesa meira

14. okt. 2011

Námsstefnan og ársfundur SÍ

Námsstefnan og ársfundur Skólastjórafélag Íslands verða haldin í dag og á morgun 14.-15. október í Stapanum, Reykjanesbæ. Um 175 félagsmenn hafa skráð sig á ráðstefnuna. Sjá hér dagskrá. Meginfyrirlestrar verða tveir, Börkur Hansen með erindið Þekkingarmolar úr rannsóknum á skólastarfi, gildi fyrir stjórnendur og Steinunn Helga sem mun fjalla um doktorsverkefni sitt Leiðtogar og lifsgildi. Fimm málstofur verða á meistaraverkefnum sem nokkrir félagar SÍ luku nú í vor. Þá verða erindi frá Mennta- og menningarmálaráðuneyti um innleiðingu á nýrri aðalnamskrá og fulltrúar frá Sambandi íslenskra sveitarfélaga munu fjalla um hlutverk, þjónustu og samstarf Sambands íslenskra sveitarfélaga við stjórnendur grunnskóla.
Lesa meira

12. okt. 2011

Fróði á Flúðum

Um miðjan ágúst s.l. tók Orlofssjóður formlega í notkun nýjan ráðstefnu- og fundarsal sem staðsettur er í sumarhúsabyggð Kennarasambands Íslands í Heiðarbyggð. Salurinn er á neðri hæð húss númer 2.
Lesa meira

12. okt. 2011

Námsstefna Flatar 4.-5. nóvember

Árleg námsstefna Flatar verður haldin 4.-5. nóvember nk. Eftir skoðunarkönnun hjá félagsmönnum var ákveðið að halda námsstefnuna á Selfossi.
Lesa meira

11. okt. 2011

Aðalnámskrá leikskóla

Mennta- og menningarmálaráðuneytið hefur sent út dreifibréf til leikskólastjóra, sveitarfélaga, skólaskrifstofa og ýmissa hagsmunaaðila þar sem vakin er athygli á útgáfu aðalnámskrár leikskóla sem tók gildi 1. ágúst sl.
Lesa meira

11. okt. 2011

Fundaröð um framhaldsskólarannsóknir í október og nóvember 2011

Námsbraut um kennslu í framhaldsskólum og Rannsóknarstofa um þróun skólastarfs boða til fundaraðar um rannsóknir á framhaldsskólastarfi. Fundirnir verða í húsnæði Menntavísindasviðs við Stakkahlíð kl. 16:10-16:55 á mánudögum í október og nóvember 2011, í stofu K-207 (á 2. hæð í Kletti, byggingunni sem er syðst og vestast í húsaklasanum). Sambærileg fundaröð verður á vormisseri 2012. Fyrsti fundurinn verður mánudaginn 17. október nk. en þá mun Sigurlína Davíðsdóttir prófessor við Menntavísindasvið fjalla um áhrif skólastjórnenda á skólastarfið.
Lesa meira

11. okt. 2011

Erindið Menntastefna og framhaldsskólalög, umfjöllun og leiðréttingar

Á aðalfundi Félags framhaldsskólakennara í mars sl. hélt Elna Katrín Jónsdóttir erindið Menntastefna og framhaldsskólalög. Erindið var síðan birt að mestu óbreytt í Skólavörðunni, 1. tbl. 2011. Höfundur fjallar hér um nokkur efnisatriði sem þarfnast ýmist leiðréttinga eða nánari skýringa.
Lesa meira

6. okt. 2011

Trúnaðarmannanámskeið FL

Í október fara fram námskeið fyrir trúnaðarmenn FL. Námskeiðin verða fimm talsins, þar af eitt í Reykjavík sem ætlað er nýliðum. Meðfylgjandi eru dagsetningar námskeiðanna ásamt dagskrám.
Lesa meira

6. okt. 2011

Frestur til að sækja um leyfisbréf

Alþingi samþykkti þann 17. september sl. lög um breytingu á lögum um menntun og ráðningu kennara og skólastjórnenda við leikskóla, grunnskóla og framhaldsskóla, nr. 87/2008, með síðari breytingum. Með breytingunni er þeim sem innrituðust í 180 eininga bakkalárnám til kennslu í leik-, grunn- og framhaldsskólum fyrir 1. júlí 2008, og áttu við lok vormissiris 2011 þrjátíu eða færri einingum ólokið til prófs, veittur frestur til að sækja um útgáfu leyfisbréfs til kennslu í leik-, grunn- og/eða framhaldsskóla til 1. júlí 2012. Sama gildir um þá sem innrituðust í 60 eininga diplómanám til kennslu í grunn- og framhaldsskólum fyrir 1. júlí 2010.
Lesa meira

6. okt. 2011

Húrra! Nemendur láta að sér kveða

Hér eru tenglar í tvær greinar eftir nemendur þar sem þeir fjalla um nám og kennslu, upplifun sína af skólum og sýn á framtíðina. Það er frábært að heyra frá nemendum sjálfum um þessi mál – mættum við fá meira að heyra.
Lesa meira

5. okt. 2011

Alþjóðadagur kennara er á Twitter og hashtag (auðkenni atburðar) er #wtd2011

Í tilefni dagsins eru hátíðahöld í höfuðstöðvum UNESCO í París. David Edwards hjá Alþjóðasambandi kennara (EI) stjórnar umræðum ásamt fleirum og hægt er að tísta um daginn og senda spurningar til Parísar á Twitter, hashtag er #wtd2011.
Lesa meira

5. okt. 2011

Alþjóðadagur kennara er í dag, 5. október - Kennarar berjast fyrir jafnrétti kynjanna

Árið 1994 var Alþjóðadagur kennara haldinn hátíðlegur í fyrsta sinn. Við hljótum öll menntun og það er okkar hagur að búa að góðum kennurum sem láta sér annt um okkur og menntun okkar. Í þeim skilningi er þetta dagur sem við getum öll gert að okkar. Þann 5. október gefst kærkomið tækifæri til að vekja athygli á starfi kennara og þrýsta á um alþjóðlegar umbætur í skólamálum. Alþjóðasamband kennara, EI, nýtir sér daginn í þessu skyni og hvetur aðildarsamtök sín til að gera slíkt hið sama. Menningarmálastofnun Sameinuðu þjóðanna, Unesco, vekur athygli á 5. október af sömu ástæðu. Kennarar eru burðarás menntunar.
Lesa meira

4. okt. 2011

Stefna Alþjóðasambands kennara, Education International, í menntamálum

Byggjum framtíðina á góðri menntun.
Lesa meira

4. okt. 2011

Stafræn verkfæri í skólastarfi

3f Félag um upplýsingatækni og menntun stendur nú fyrir könnun á nytsamlegustu stafrænu verkfærunum í skólastarfi. Í því skyni að afla upplýsinga um hvaða stafrænu verkfæri nýtast best í íslensku skólastarfi óskum við eftir því að kennarar, skólastjórnendur, ráðgjafar, námsefnishöfundar og aðrir sem starfa í kennslugeiranum deili með okkur lista yfir þau 10 stafrænu verkfæri sem komið hafa þeim að hvað bestum notum í starfinu.
Lesa meira

3. okt. 2011

Felix Bergsson syngur ljóð Páls Ólafssonar - tónleikar í Salnum

Felix Bergsson sendi frá sér sína fyrstu sólóplötu, Þögul nóttin, þann 27. september. Það sama kvöld voru útgáfutónleikar í Salnum í Kópavogi. Þeir gengu svo vel að nú stendur til að endurtaka leikinn þriðjudagskvöldið 11. október í samstarfi við Landsbankann. Almennt miðaverð er 3.000 krónur en með þessu bréfi er kennurum boðnir miðar á tónleikana með 20% afslætti. Það eina sem þarf að gera er að hringja í miðasölu Salarins 5 700 400 og nefna þetta tilboð.
Lesa meira