Kennarasamband Íslands

8. mar. 2007

NUMU ráðstefna og tónlistarmót í Vejen í Danmörku

Ráðstefna NUMU (Norræn samtök tónlistaruppalenda) sem haldin er annað hvert ár í einhverju Norðurlandanna verður nú haldin öðru sinni eftir sameiningu norrænna skólastjórnenda og kennara í ný samtök árið 2004. Ráðstefnan fer fram í Vejen í Danmörku og stendur yfir dagana 30. mars – 3. april 2007. Yfirskrift ráðstefnunnar að þessu sinni er „Musik for livet“ og er hún ætluð bæði stjórnendum og kennurum tónlistar- og listaskóla. Ráðstefnan fer fram á Norðurlandamálum og ensku.

Dagskrá

Á ráðstefnunni, sem hefst á hádegi föstudaginn 30. mars og lýkur á hádegi þriðjudaginn 3. apríl, er boðið upp á fjölbreytta dagskrá í formi fyrirlestra, málstofa og námskeiða auk tónleika eða annarra viðburða alla dagana og skemmtiferðar á sunnudeginum. Fyrirlesarar koma frá öllum aðildarlöndum NUMU þ.e. Noregi, Danmörku, Finnlandi, Svíþjóð, Íslandi og Færeyjum. Hér á eftir má sjá yfirskriftir dagskrárliða ráðstefnunnar en hægt er að skoða nánar alla dagskrána á vefslóðinni:
http://www.numu2007vejen.dk.

Fyrirlestrar, málstofur og námskeið

Hvers vegna tónlistarkennsla?

Frede V. Nielsen – (DK)
Prófessor við „Danmarks Pædagogiske universitet“

Tónlist á unga aldri

Bengt Olsson – (SE)
Prófessor við „Göteborgs Universitet“

Kennsluaðferðir tónsmíða – hvað er nú það?

Bjørn Kruse – (NO)
Prófessor við „Norges Musikkhøyskole i Oslo“

„Músíkþerapía“

Lars Ole Bonde – (DK)
Lektor við „Aalborg Universitet“

Tónlistarmiðlun á netinu

Jørgen Mortensen – (DK)
Dósent við „Vestjysk Musikkonservatorium“

Börn og söngur

Linda Vilhelmsen – (DK)
Lektor við „Haslev Seminarium“

Tónlist og heilarannsóknir

Peter Vuust – (DK)
Dósent við „Det Jyske Musikkonservatorium“

Samþætting listgreina – tónlistin í mynd, dansi og leiklist

„Stockholms Musikpedagogiska Institut“ – (SE)

Reynsla af píanókennslu eftir stigakerfi

Elisabeth Lang – (SE)
„Lidingø Musikskola“

Sellókennsla barna frá 5 ára aldri

Helena Råberg-Schrello – (SE)
Lektor við „Kgl. Musikhögskolan i Stockholm“

„Skólinn sem vettvangur menningar“ og „Heild – Skóli og menning“

Alexander Krohg Plur / Tormod Björnstad – (NO)

Kynning á „Chorissimo“ fyrir kórstjórnendur og kórsöngvara

Ulrika Bergroth-Plur – (NO)

Kynning á hinu vel heppnaða verkefni „Musical Crash Course“

Are Fevang – (NO)

„Jeunesses Musicales i Norden“

Alexander Krohg Plur – (NO)

Kennslufræði dægurtónlistar

Lauri Väkevä – (FI)
„Sibelius Akademiet“

Tónlist á netinu

Matti Ruippo – (FI)
„Sibelius Akademiet“

Tónskáldið í skólanum

Markus Fagerudd – (FI)

Mikilvægi menningarörvunar barna og menning sem form samskipta

Árni Sigurbjarnarson – (IS)
Skólastjóri Tónlistarskóla Húsavíkur

Samtímatónlist í tónlistarkennslu

Sunleif Rasmussen – (FÆ)

Norræn netverk fyrir skólatónleika:

Lifandi tónlistarflutningur í skólanum

Ebbe Høyrup – (DK)

Tónlistarupplifun í leikfimisalnum

Per Ekedal – (SE)
„Rikskonserter“

Ráðstefnustaður - Vejen Kongreshotel

Ráðstefnan fer fram á Vejen Kongreshotel í Vejen í Danmörku en staðsetningu Vejen má sjá á kortinu hér fyrir ofan.

Uppihald

Gisting í eins manns herbergi kostar 3380 DKK og í tveggja manna herbergi kostar gisting fyrir einn 2780 DKK. Innifalið í verðinu er morgunverður alla ráðstefnudagana auk eftirtaldra máltíða:

• Föstud. – „brunch“ og kvöldverður
• Laugard. – hádegisverður og kvöldverður
• Sunnud. – hádegisverður
• Mánud. – hádegisverður og kvöldverður
• Þriðjud. – hádegisverður

Verðin miðast við að skráning fari fram ekki seinna en 15. janúar 2007. Upplýsingar um stök verð fyrir gistingu og máltíðir er að finna á fyrrnefndri vefsíðu.

Ráðstefnugjald

Ráðstefnugjald er 2500 DKK fram til 1. febrúar 2007 en eftir þann tíma hækkar gjaldið í 3000 DKK. Auk þátttöku í öllum dagskrárliðum felur gjaldið í sér kaffi alla dagana og skipulagða kvöldviðburði í framhaldi af dagskrá, tónleika ofl. Fyrir skemmtiferð og kvöldverð á sunnudeginum greiðist sér gjald eða 350 DKK.

Umsóknareyðublað

Þátttaka tilkynnist á þar til gert umsóknareyðublað sem nálgast má á vefslóðinni: www.numu2007vejen.dk.

Norrænt tónlistarmót fyrir tónlistarnema á aldrinum 12-18 ára

Haldið 30. mars til 3. apríl 2007

Sem fyrr verður haldið norrænt tónlistarmót fyrir tónlistarnema á aldrinum 12-18 ára samhliða ráðstefnunni í Vejen. Gert er ráð fyrir 300 þátttakendum og geta allir tekið þátt hvort sem um ræðir hópa eða einstaklinga, kóra, hljómsveitir (stórar og smáar) eða aðra hljóðfæra– og söngnemendur. Þema mótsins er „Tónlist frá miðöldum til dagsins í dag.“ Boðið verður upp á eftirtaldar vinnustofur:

• Músík og dans frá miðöldum
• Jazz / rokk
• Kór og leiklist
• Stomp
• Nútíma tónlist

Á tónlistarmótinu gefst nemendum tækifæri til að hitta aðra tónlistarnema og deila með þeim reynslu sinni úr tónlistarheiminum. Þá halda þátttakendur tónleika fyrir aðra þátttakendur sem og staðarbúa og aðra gesti.

Þátttökugjald er 1495 DKK. Innifalið í gjaldinu er gisting og fæði, vinnustofur og ferð í Legoland. Nánari upplýsingar um tónlistarmótið er að finna á vefslóðinni www.numu2007vejen.dk. Tilkynning um þátttöku berist fyrir 1. febrúar 2007 til skrifstofu FT.