Frétt
13. jún. 2007
Við eigum að meta störf kennara
Athygli vekur að Morgunblaðið hefur undanfarið birt fjöld frétta og greina um skólastarf víða um land. Kennarastarfið og menntamál í víðu samhengi hafa líka komið við sögu í leiðaraskrifum blaðsins. Í leiðara sunnudaginn 10. júní sl. segir meðal annars: „Kennarar vinna svo mikilvægt starf í þágu unga fólksins að þeir eiga kröfu á að það verði metið að verðleikum og þá meðal annars í launum. Kennarar geta ráðið úrslitum um farsæld hinna ungu kynslóða.“ Síðar í leiðaranum segir: „Við eigum að sýna í verki, að við metum störf kennara, hvort sem er á leikskólastigi, grunnskólastigi, framhaldsskólastigi eða í háskóla.“ Umfjöllun Morgunblaðsins um menntamál er þakkarverð og tímabær. Kennurum þótti furðu sæta hversu lítið stjórnmálamenn ræddu um málaflokkinn í aðdraganda og eftirmála alþingiskosninga og vonandi verður átak Morgunblaðsins til þess að þeir sem aðrir taki við sér og sýni menntun þann gaum sem henni ber.Til baka