Kennarasamband Íslands

7. maí 2012

Vissir þú að ...

... kennarar eru taldir vera í mestri áhættu að skaða röddina við vinnu sína?

Rannsóknir hafa sýnt fram á að:

• Talið er að milli 20%-80% kennara þjáist af ýmsum álagseinkennum á rödd (þurrkur, erting, sviði, kökkur, hæsi án kvefs, ræskingaþörf, raddbrestur, raddþreyta).
• Kennarar eru taldir vera í mestri áhættu að skaða röddina við vinnu sína. Ástæður? Líkamlegar, andlegar og óvistvænt umhverfi.
• Helmingi fleiri kennarar kvarta undan raddvandamálum miðað við þá sem starfa ekki sem kennarar.
• Kennarar skipa efstu sæti þeirra sem leita til læknis vegna raddvandamála og óþægindaeinkenna þeim tengdum.
• Kvenfólki er hættara við raddvandamálum sérstaklega af líffræðilegum orsökum og um 80% kennara eru konur.
• Bjartar kvennaraddir falla inn í kliðinn frá nemendum.
• Kennarar sem hafa lengri kennsluferil kvarta meira undan álagseinkennum á röddina.
• 44% kennara kenna kennsluumhverfi um raddvandamál sín.
• 20% kennara hafa þurft að taka veikindaleyfi vegna raddar miðað við 4% þeirra sem starfa ekki sem kennarar.
• Markviss raddþjálfun hefur fækkað veikindadögum hjá kennurum.
• Börn hafa dæmt persónur leiðinlegar ef þeim líkar ekki röddin, burtséð frá öllu öðru.

(Heimild: Valdís Ingibjörg Jónsdóttir (2005). Vistvænar forsendur í kennsluhúsnæði. Ráðstefna á vegum Umhverfisstofnunar, Heyrna- og talmeinastöðvar Íslands, Lýðheilsustöðvar, Umhverfissviðs Reykjavíkurborgar og Vinnueftirlits ríkisins.)

Það er því mikilvægt fyrir kennara að kynna sér hvernig röddin virkar og hvað hefur áhrif á hana, hvernig sé best að beita henni til að það sem sagt er skili sér til nemendanna án þess að það bitni á raddheilsu kennarans.

Hvað er hægt að gera? Fyrir kennara er mælt með:

• að nota magnarakerfi,
• að dragar úr hávaða - t.d. setja einangrun á snertifleti húsgagna og einangrun í loft og á veggi,
• að bæta inniloft – t.d. hafa opna glugga eins og hægt er og hafa eftirlit með loftræstikerfum,
• að fá kennslu í raddbeitingu.

Smellið hér til að skoða meira efni um röddina og raddheilsu kennara.
Bæklingurinn Raddheilsa kennara.