Kennarasamband Íslands

1. gr.

Nafn og lögheimili

Sjóðurinn heitir Orlofssjóður Kennarasambands Íslands og er eign þess. Lögheimili hans og varnarþing eru í Reykjavík.

2. gr.

Tilgangur sjóðsins

Tilgangur sjóðsins og hlutverk sjóðsstjórnar er:

• Að kaupa orlofsheimili einn sér eða ásamt öðrum, fjármagna byggingu þeirra og annast viðhald og rekstur á þeim hluta er heyrir undir sjóðinn. Fjárfesting og eignasala, annað en eðlilegt viðhald eigna, er þó ekki heimil nema að fengnu samþykki stjórnar KÍ.
• Að taka á leigu orlofshús og endurleigja félagsmönnum eftir því sem þurfa þykir.
• Að annast úthlutun orlofshúsa KÍ skv. reglum sem stjórnin setur sér. Reglur þessar skulu hljóta staðfestingu stjórnar KÍ.
• Að semja um orlofsferðir fyrir félagsmenn KÍ innan lands sem utan.

3. gr.

Tekjur

Tekjur sjóðsins eru sérstakt gjald sem vinnuveitendur greiða í Orlofssjóð vegna félagsmanna í KÍ, vaxtatekjur svo og tekjur af rekstri orlofsheimila og ferðaþjónustu.

4. gr.

Stjórn

Stjórn sjóðsins skipa sjö menn og þrír til vara. Skulu þeir kosnir á þingi KÍ. Formaður skal kjörinn sérstaklega og síðan sex meðstjórnendur. Stjórnin skiptir að öðru leyti með sér verkum. Heimilt er stjórn að kjósa úr sínum röðum þriggja manna framkvæmdastjórn og setur stjórnin henni ákveðnar reglur um verksvið. Reglur þessar skulu hljóta staðfestingu stjórnar KÍ. Einnig er stjórn heimilt að skipa nefndir úr hópi félagsmanna til að annast ákveðin verkefni.

Ef formaður lætur af störfum á kjörtímabilinu skipar stjórn KÍ nýjan formann.

5. gr.

Kostnaður af starfi stjórnar og starfsemi sjóðsins

Allur kostnaður af starfi stjórnar og starfsemi sjóðsins greiðist úr Orlofssjóði svo og sú þjónusta sem skrifstofa KÍ veitir skv. samkomulagi við stjórn sambandsins.

6. gr.

Reikningar og endurskoðun

Reikningar sjóðsins skulu birtir með reikningum KÍ. Þeir skulu endurskoðaðir af kjörnum skoðunarmönnum sambandsins svo og löggiltum endurskoðendum.

7. gr.

Breytingar á reglum sjóðsins

Reglum þessum má aðeins breyta á þingi KÍ og fer með þær breytingar eins og um lagabreytingu væri að ræða.

Reglur þessar voru samþykktar á 4. þingi KÍ 9. - 11. apríl 2008.

- Að gefnu tilefni -

Allur rekstur Orlofssjóðs er greiddur af orlofsgjaldi vinnuveitanda til Orlofssjóðs en er EKKI tekinn af félagsgjöldum félaga í KÍ