is / en / dk

12. Nóvember 2014

Tónlistarskólakennarar skora á sveitarfélögin að fylgja eigin markmiði sem felur í sér jafnrétti í launasetningu og leiðrétta þegar í stað launakjör kennara í Félagi tónlistarskólakennara. Þetta er meðal þess sem kemur fram í ályktun sem samþykkt var á fundi í Verkfallsmiðstöð FT í Valsheimilinu í dag.

Í ályktun fundarins er jafnframt lýst yfir áhyggjum af tónlistarmenntun hérlendis og bent á að slæm fjárhagsstaða sveitarfélaga réttlæti ekki að lítill hópur kennara innan KÍ sitji eftir í launakjörum. 

Verkfall tónlistarkennara hefur í dag staðið yfir í þrjár vikur og því miður virðist sátt ekki í sjónmáli. Ríkissáttasemjari sleit fundi á tíunda tímanum á mánudagskvöld og hefur ekki boðað til næsta fundar. 

Ályktun fundarins er svohljóðandi: 

Ályktun fundar félagsmanna FT – sem haldinn var í Verkfallsmiðstöðinni að Hlíðarenda 12. nóvember 2014.

„Fundur í Verkfallsmiðstöð FT skorar á sveitarfélögin í landinu að fylgja sínu meginsamningsmarkmiði í kjaraviðræðum 2014 sem felur í sér jafnrétti í launasetningu.

Slæm fjárhagsstaða sveitarfélaga réttlætir ekki að lítill hópur innan Kennarasambands Íslands sé látinn sitja eftir í launakjörum. Ákvarðanir um hvar skuli skorið niður verða að vera teknar á öðrum vettvangi en við gerð kjarasamninga.

Fundurinn lýsir yfir verulegum áhyggjum af þeirri aðför gegn tónlistarskólakerfinu og tónlistarmenntun sem virðist vera að ná hápunkti um þessar mundir.

Verkfall tónlistarkennara hefur nú staðið í þrjár vikur með tilheyrandi kjaraskerðingu þeirra sem lagt hafa niður störf. Það er með öllu ólíðandi að sveitarstjórnarmenn skuli setja þennan hóp, sem síðustu ár hefur dregist aftur úr öðrum sambærilegum hópum í tekjum, í enn frekara fjárhagslegt uppnám við það eitt að knýja á um kjarabætur sem allir sjá að eru nauðsynlegar og réttlátar.

Fundurinn krefst þess að sveitarfélögin í landinu láti til sín taka í þessu máli og gangi þegar til samninga.“ 
 

Tengt efni