is / en / dk

22. Nóvember 2014

Vegna yfirlýsingar stjórnar Sambands íslenskra sveitarfélaga í gær vill stjórn Kennarasambands Íslands ítreka það sem fram kom í ályktun hennar fyrir rúmum mánuði. Þar er harmað að tónlistarskólakennarar skuli þurfa að grípa til þess neyðarúrræðis að boða verkfall meðal félagsmanna sinna. Stjórn KÍ bendir jafnframt á að ábyrgð vinnudeilunnar hvíli á herðum sveitarfélaga því félagar í FT geti með engu móti sætt sig við lakari kjör en aðrir félagsmenn KÍ njóta. Það vekur sérstaka athygli að allt sem fram kemur í þessari ályktun skuli enn eiga við nú rúmlega mánuði síðar. 

Ályktunin er svohljóðandi: 

Stjórnarfundur KÍ haldinn 17. október 2014 harmar að Félag tónlistarskólakennara hafi þurft að grípa til þess neyðarúrræðis að boða verkfall meðal félagsmanna sinna. Stjórn KÍ bendir á að ábyrgð vinnudeilunnar hvílir fyrst og fremst á herðum stjórnvalda því tónlistarskólakennarar og stjórnendur tónlistarskóla geta með engu móti unað við að vera lægra sett en aðrir félagsmenn KÍ í launum. Tilboð samninganefndar sveitarfélaga er algerlega óviðunandi og myndi skilja tónlistarskólakennara og stjórnendur tónlistarskóla verulega í launum frá öðrum félagsmönnum KÍ.

Slík mismunun í launum einstakra félagsmanna Kennarasambands Íslands er algerlega óásættanleg enda í andstöðu við markmið Sambands íslenskra sveitarfélaga um að sambærileg og jafnverðmæt störf séu launuð með sama hætti.

Það er mikilvægt að þessi deila leysist sem fyrst svo hún bitni ekki á tónlistarnemendum út um land allt. Það uppbrot á tónlistarnámi sem verkfall myndi valda getur haft veruleg áhrif á námsframvindu og þann árangur sem námsárið skilar tónlistarnemendum. Það er í takt við þarfir einstaklingsins sem og samfélagsins í heild að gera tónlistarkennslu jafnhátt undir höfði og öðrum námsgreinum í menntakerfinu.

Stjórn KÍ skorar á stjórnvöld að stíga fram og veita samninganefnd sveitarfélaga umboð til að mæta réttmætum kröfum tónlistarskólakennara og stjórnendum tónlistarskóla um nauðsynlegar kjaraleiðréttingar.

Tengt efni