is / en / dk

31. Maí 2018

Samninganefnd Félags grunnskólakennara hefur falið kjörstjórn Kennarasambands Íslands að framkvæma allsherjaratkvæðagreiðslu meðal félagsmanna Kennarasambands Íslands í FG er starfa hjá sveitarfélögum landsins. Greidd eru atkvæði um samkomulag um breytingar og framlengingu á kjarasamningi milli Kennarasambands Íslands vegna grunnskóla og sveitarfélaga landsins, sem skrifað var undir 25. maí 2018. Hafi gagnaðila ekki borist tilkynning um niðurstöðu fyrir kl. 16:00 þann 6. júní 2018 skoðast hann samþykktur. 

  • Atkvæðagreiðsla hefst fimmtudaginn 31. maí klukkan 14:00. 
  • Atkvæðagreiðslu lýkur þriðjudaginn 5. júní klukkan 14:00. 

Atkvæðisrétt hafa félagsmenn í Félagi grunnskólakennara sem starfa hjá sveitarfélögum landsins. Þeir sem ekki hafa rétt til að taka þátt í kosningunni eru félagsmenn sem eru í launalausu leyfi, félagsmenn sem hafa beina félagsaðild að KÍ, félagsmenn sem þiggja atvinnuleysisbætur og starfsmenn KÍ. Atkvæðagreiðslan er leynileg og leggur kjörstjórn áherslu á að félagsmenn virði það í hvívetna.

Atkvæðagreiðslan
Atkvæðagreiðslan fer fram á Mínum síðum á www.ki.is Hægt er að greiða atkvæði í hvaða nettengdri tölvu sem er. Kjósendur þurfa að skrá sig inn á Mínar síður með Íslykli eða rafrænum skilríkjum. Þeir sem ekki eru komnir með Íslykil geta pantað hann með því að smella á hnappinn Mig vantar Íslykil sem er á innskráningarsíðunni. Þegar komið er inn á Mínar síður birtist tengill á kosninguna.

  • Smellið á tengilinn sem heitir Atkvæðagreiðsla um kjarasamning FG 2018 og þá birtist atkvæðaseðillinn.
  • Veljið einn af eftirfarandi svarmöguleikum sem eru: Já, Nei, Skila auðu.
  • Smellið að lokum á flipann Kjósa og þá birtist eftirfarandi texti til að staðfesta að atkvæði hafi verið greitt: Atkvæði þitt hefur verið móttekið.
  • Félagsmaður getur skipt um skoðun og kosið aftur. Með því að kjósa aftur ógildist fyrri kosning. Hver kennitala skilar einungis síðasta greidda atkvæði. Ef viðkomandi vill fresta því að greiða atkvæði skal smella á: Hætta við kosningu.

Hlutverk trúnaðarmanna
Samkvæmt ákvörðun kjörstjórnar um framkvæmd leynilegrar allsherjaratkvæðagreiðslu eru trúnaðarmenn Kennarasambands Íslands umboðsmenn kjörstjórnar í hverjum skóla. Kjörstjórn beinir þeim tilmælum til trúnaðarmanna að þeir hlutist til um að kennarar hafi aðgang að tölvu í skólanum og veiti þeim aðstoð við atkvæðagreiðsluna sé þess óskað. Jafnframt beinir kjörstjórn því til trúnaðarmanna að þeir hvetji félagsmenn til að nýta kosningarétt sinn. Dæmi eru þess að upplýsingar um netföng félagsmanna hafi ekki borist KÍ. Trúnaðarmenn eru beðnir um að fylgjast með því hvort allir kennarar skólans hafi fengið upplýsingar um kosninguna.

Atkvæðaseðill birtist eingöngu hjá þeim sem eru á kjörskrá. Ef einhver telur sig eiga að vera á kjörskrá en fær ekki atkvæðaseðil á Mínum síðum skal viðkomandi hafa samband við starfsmann kjörstjórnar sem athugar málið.

Nánari upplýsingar um atkvæðagreiðsluna eru veittar á skrifstofu KÍ en starfsmaður kjörstjórnar er Fjóla Ósk Gunnarsdóttir, netfang: fjola@ki.is sími: 595 1111.
 

 

 

Tengt efni